Abasemagunyeni bequmrhu lelijongene nemicimbi ethengisa ngotywala ephondweni. uKhanyile Maneli, noAndiswa Vikilahle ongumlawuli oyintloko kwizimali zeliqumrhu. umfanekiso: Michael Pinyana. Abasemagunyeni bequmrhu lelijongene nemicimbi ethengisa ngotywala ephondweni. uKhanyile Maneli, noAndiswa Vikilahle ongumlawuli oyintloko kwizimali zeliqumrhu. umfanekiso: Michael Pinyana.
Abongile Ginya
Ibhodi elawula ukuthengiswa kotywala eMpuma Koloni ithi ukuthengiswa kotywala kulonyusa kakhulu uqoqosho neemeko-ntlalo zeli phondo.
Oku kudizwe yile bhodi izolo eMonti ngethuba bekubanjwe indibano emfutshane nonoondaba ibeka thaca uphando lwakutshanje lwabo abathe balwenza, malunga nomthamo owenziwa luqoqosho lweshishini lokuthengiswa kotywala.
Noxa kunjalo, le bhodi ithi iyaqhuba nephulo lokwenza ugqogqo kwiindawo ezithengisa utywala ngokungekho semthethweni. Zingaphaya kwamakhulu amane (405) iindawo zentselo ezingekho semthethweni esele zivaliwe, ngokokutsho kwale bhodi.
“Ukungabi nazimpepha-mvume zokuthengisa utywala nokuba sivutha kangakanani isikroxo sakho, ukuba awuna zimpepha siza kusivala. Sikhuthaza uluntu luzibhalise iindawo zalo kwaye nabo banazo iimpepha mabazihlaziye kuba xa ungayi uza kufana nongenayo nawe,” utshilo oyingqonyela kule bhodi uKhanyile Maneli.
UManeli uthi iinjongo zabo kukukhuthaza abanini-zikroxo ukuba bathengise utywala ngokusemthethweni.
UZola Tyikwe, umhloli oyintloko kule bhodi uthi nabani na osekuhlaleni abe enento engonelisiyo ngesikroxo esisekuhlaleni unalo ilungelo lokubatsalela bachaze ngokungabonelisiyo kwiindawo zabo zokuhlala, watsho esithi nabani na unalo ilungelo lokuthengisa xa efuna ukuthengisa ayikhethanga bani kodwa ube iimpepha zona unazo.
Logama uPumlani Tyali ojongene neempepha-mvume zokuthengisa kule bhodi esithi, ukhuthaze uluntu ukuba lujonge isatifiketi esigunyazisa ukuthengiswa kotywala, rhoqo xa lungena kwisikroxo eso.
Le bhodi ijongene nezicelo ezingaphaya kwamawaka asibhozo abantu abafuna ukuthengiswa kotywala kweli phondo.
Kweyona mizi ichitha imali eninzi ekuthengeni utywala, ingingqi yase-Alfred Nzo ibonakale iphala phambili ilandelwa yi-OR Tambo ze kuze i-Amathole. Le bhodi ithi iMpuma Koloni ikwindawo yesibini ngokuselwa kotywala kwilizwe liphela
Othethela le bhodi uMsiya Mgwebi uvale ngelithi, benza ngako konke nakumcimbi wokuzama ukwehlisa izinga lolutsha oluzigaxela kwiziyobisi ingakumbi olo lukhulelweyo. Uthi banamaphulo okudibanisa ulutsha ngokuba neengxoxo-mpikiswano, imidlalo yeqonga, kwakunye nezemidlalo ezohlukeneyo.
“Nabazali siyabakhuthaza ukuba babenothethwano nabantwana babo,” utshilo uMgwebi.
Le bhodi idize nokuba ikwiingxoxo malunga nomba weminyaka xa uthengiselwa utywala nethi yayisifakile isicelo sawo. Inombolo yalebhodi ngu-0800 000 420.