Abongile Ginya
Isaphokoka imiyalezo yovelwano kwikhaya lalowo ebesakuba yinkokheli yombutho weCope eMpuma Koloni uSam Kwelita.
Lo kaKwelita uthe wabhubhela kwisibhedlele sabucala eMonti ngoLwesibini emva kwengulo emfutshane. UJoe Kwelita ongubhuti kaSam uthi iyabamoleza imiyalezo ethe gqolo ukungena.
“Isaphokokha nangoku imiyalezo yovelwano ephuma kwimibutho yezopolitiko ngokohlukana kwayo isithuthuzela kweli khaya ngokushiywa kwethu ngubhuti. Le miyalezo iphuma kumbutho weDA, oweANC, iCope neminye”, utshilo uKwelita.
Inkulumbuso yephondo IeMpuma Koloni uPhumulo Masualle iwadlulisile amazwi ovelwano kwizihlobo zikaKwelita. UMasualle uthi lo kaKwelita ulusebenzele uluntu lwase Mpuma Koloni.
“Wangena emzabalazweni ngeenjongo zokuphucula iimpilo zoluntu lwephondo nanjengoko lo kaKwelita eye wasebenza njengelungu lepalamente ephondweni, wanguye nomphathiswa wezendlela kwakunye nemisebenzi yoluntu kuquka nophuhliso lwentlalo yoluntu. Ukubhubha kukaKwelita kushiya isithuba esikhulu kweli phondo”, utshilo uMasualle.
Usihlalo weDA eMpuma Koloni uVeliswa Mvenya uthi , igalelo likaKwelita kuphuhliso lwentlalo yoluntu kweli abasokuze balilibale.
“Ohloniphekileyo uKwelita ube lilungu lendlu yowiso-mthetho ukusuka ngowe - 1994 ukuya ngowe -2014. Siyi-DA sidlulisa amazwi ovelwano kusapho lakwaKwelita”, utshilo uMvenya. Amalungiselelo omngcwabo besingekawazi nanjengoko usapho lakwaKwelita beluvalelene kwindibano ngenjikalanga yayizolo.