Umphathiswa uPhemmy Majodina kunye nabanye ooceba bahlanganisene kwindibano ememelel'uxolo kunye nabemi bangaphandle kwiholoyesixeko saseMonti. umfanekiso Michael Pinyana. Umphathiswa uPhemmy Majodina kunye nabanye ooceba bahlanganisene kwindibano ememelel'uxolo kunye nabemi bangaphandle kwiholoyesixeko saseMonti. umfanekiso Michael Pinyana.
Siyabulela Mqikela
Oyinkokheli yeqela labantu abaphuma kwilizwe lase Uganda nase Kenya uOma Lule, wenze amazwi ombulelo kubantu bephondo le Mpuma Koloni kwidolophu yase Monti, ngokubaxhasa ngethuba bevakalisa intlungu yokubukulwa kwabo ngabantu abathile kweli loMzantsi Afrika.
Oku kwenzeke izolo ngethuba bebegqithisa uxwebhu labo lezikhalazo kumasipala ombaxa wase Buffalo City bevakalisa intlungu yokubukulwa kwabo ngabemi beli.
Inkulumbuso yase Mpuma Koloni uPhumulo Masualle, umphathiswa wesebe lemidlalo, ulonwabo, ubugcisa nenkcubeko kweliphondo uPemmy Majodina, kwakunye nosodolophu wase Buffalo City uZukiswa Ncitha, bebeyinxalenye yeligqiza bephelekwa ngamagosa aphezulu aseburhulumenteni.
Iinjongo zomngcelele ibikukubonakalisa inkxaso kubantu bamazwe angaphandle ko Mzantsi Afrika emva kokukhula kweziganeko zokubethwa kwanokonakaliswa kweevekile neendawo abahlala kuzo.
Lo ka Lule uthi abantu belizwe loMzantsi Afrika mabafunde ukwebelana nabo bavela kumazwe angaphandle . ULule ukwavakalise amazwi ombulelo kurhulumente welizwe loMzantsi Afrika ngokubaxhasa ngokuthi abanike ukhuseleko kwanendawo zokufihla intloko kanye ngelixesha lokukhula kweziganeko zokubukulwa kwabantu abaphuma kumazwe angaphandle.
Uninzi lwabantu abathathe inxaxheba kulomcimbi bavakalise ukuba bakuchasile ukutshutshiswa kwabantu abaphuma kumazwe angaphandle koMzantsi Afrika. “Sicela ukukhuselwa ngabantu beli loMzantsi Afrika, asizizo izaphuli-mthetho, kwaye sicela naba bethu abantu ukuba baxelele urhulumente ngeziganeko zolwaphulo-mthetho,” utshilo uLule.
UMasualle ungene kwiivenkile zabemi bangaphandle, ebaxelela ukuba mabathobe amaxhala kuba urhulumente uzakuba khusela.
Ethetha nenginginya ibizimase lomcimbi uMajodina uthe urhulumente welizwe loMzantsi Afrika unoxanduva lokugcina uzinzo nocwangco, ngokuthi akhusele wonke umntu. “Sineenjongo zokwenza uMzantsi Afrika onoxolo nabo bonke abantu abakwilizwe lethu, kwaye sisoloko sijongwe nje ngelizwe ekumele ukuba lidlale indima ecacileyo ukuqinisekisa uzinzo nakwamanye amazwe,” uthethe watsho uMajodina.
Ingxelo ye-ofisi kaMajodina ithi, zininzi iziganeko ezizakuqhubeka kweli phondo kule veki ukuzama ukulwa ukukhula kwezehlo zokubukulwa kwabantu abaphuma kumazwe angaphandle koMzantsi Afrika.