Abasebenzi baseBuffalo City Municipality bamise idolophi namhlanje bekhalazela ukungahlonitshwa kwamalungelo wabo, urhwaphilizo nolawulo oluhexayo
Image: Pedro Mapelo/I'solezwe lesiXhosa
Umbhutho wabasebenzi boomasipala, iSouth African Municipal Workers Union (Samwu), ukhokele umngcelele wabasebenzi baseBuffalo City Metro osuke eNorth End wayokuqhina eholweni loluNtu edolophini eMonti.
Abasebenzi baphume ngendlu ngentsasa yanamhlanje beyokugqamisa izinto ezininzi ezingabonwabisiyo kumasipala abamsebenzelayo. Oku kwenzeka emva kokuba lo masipala ombaxa ubusematheni kwiveki ephelileyo ngenxa yolawulo oluhesheheshe nokuchithwa kwemali ngendlela ekhwinisayo olubhenziswe yikomiti yePalamente, iScopa.
Phakathi kwezinto abasebenzi abakhale ngazo kukungahlonitshwa kwemithetho yabasebenzi, ukungabhatalwa kwemali yeKhovithi (Covid-19), ukuxhatshazwa kwabasebenzi bethutyana abaphantsi kwe-Expanded Public Works Programme (EPWP), ukuthathwa komsebenzi unikwe iinkampani zabucala, ukungaphathwa kakuhle kwemali, urhwaphilizo nokungaqini kolawulo kumasipala.
Abasebenzi, bekhokelwa yiSamwu, bathe bacela ukuphendulwa kweengxaki zabo zingaphelanga iintsuku ezilishumi elinesine. Ixwebhu ebeligcwele izinyanzeliso zabasebenzi lamkelwe nguSodolophu ngokwakhe uPrincess Faku wathembisa ngelithi iSamwu iza kuzifumana iimpendulo ngendlela ecele ngayo.
"Siyazamkela izikhalo eziphakanyiswe ngabasebenzi baseBuffalo City. Isigqeba sikamasipala asivumi ukuba kukho izinto ezingasombululekiyo phakathi kukamasipala nabasebenzi. Sizamile ukubamba intlanganiso nabo kwiveki ephelileyo kodwa yamiswa kuba belungiselele umngcelele wanamhlanje," utshilo uFaku.
"Izinto ezifana nemali yeKhovithi abayifunayo yinto engekho sezandleni zethu, ikurhulumente omkhulu," utshilo uFaku ethetha neentatheli. "Kwicala labasebenzi abakwiEPWP, umasipala ubabhatala abasebenzi abakula nkqubo ngomthetho olawula yona. Ukuba kukho into engaphaya komthetho, asazi ke.
"Siyavumelana neSamwu ngomba wemisebenzi enikwa iinkampani zabucala. Sinethuba sizama ukuqubisana nawo lo mba neSamwu. Indothusile into yokuba namhlanje ibe yinto abayikhalazelayo. Kukho uphando olwenziwa ngaphakathi ngendlela iimoto okanye izithuthi ezisetyenziswa ngayo," utshilo usodolophu.
Related Topics: