Umnikazi weTyekana ManB Security eCambridge Hall ngethuba eqokelele zonke iiforam zasekuhlaleni ukuza nesisombululo sokuxhatshazwa 'kwamaphara' xa kuptrolwa.
Image: ABONGILE GINYA
Imvumi yaseMpuma Koloni, uMlindelwa Tyekana nodume ngelika 'ManB' igama, uthi abantwana abazibandakanya kwezolwaphulo-mthetho ezilokishini ababizwa ngokuba 'ngamaphara' nabaye bathi bakhutshwa yindlala ukuze babesezitalatweni bamoshe, uthi mabangangxalwa ngeepasele zokutya nguRhulumente koko mabafumane uqeqesho ngezakhono ezakuthi zibeke ezopasele zokutya etafileni kumakhaya abo.
UManB nokwangumnikazi wenkampani iTyekana ManB Security ukutsho oku kwiholo laseCambrigde eMonti ngethuba le nkampani ibize indibano namagosa kaRhulumente kwanemibutho yokhuselo yasekuhlaleni, iiforam ukutsho, ngeenzame zokuza nesisombululo kwingxaki ekhoyo ebaphakathi kweeforam kwakunye 'namaphara' aye abethwe ebusuku xa ebonwa ziiforam.
"Ndiphakanyiswe kukubona ukuba eyonanto ihamba phambili ngoku aba bantwana bamoshayo ngamaxhoba okunkulwa ziiforam, ukucinezelwa kwabo endaweni yokuba kukhangelwe unobangela wokuphuma kumakhaya abo bayokumosha. Unobangela ke asimkhangeli kuba siyamazi yindlala. Isisombululo sendlala ayizopasele zokutya ezizathi ziphele aphinde alambe ayokuqala apho ebeyeke khona ukumosha. Isisombulululo kukunika abantwana izakhono bafundiswe izakhono zokwenza imali azokwazi ukuzithengela nokuziphilisa," utshilo uManB Tyekana.
OweB Hostel Patrollers uNgconde Phila Meyiseki eMonti uthi kunzima ukusebenza bengenazixhobo kodwa babe bona 'amaphara' exhobile.
Image: ABONGILE GINYA
Okwiforam iB Hostel Patrollers eDuncan Village nosele ngoku ekwiforam edibanisa zonke iiforam eziseBCM, uPhila Meyeliseki owaziwa ngelikaNgconde, uthi bayilwa kangangoko kwiforam yabo eyokubetha kwanokonzakalisa 'amaphara' koko bayawathatha bawabizele amaPolisa.
UMeyeliseki uthi okunye abakulwayo ligama elibi leeforam ekuthwa zibetha abantu okanye amalungu afuna imali ngenkani emizini, imali leyo yaziwa ngokuba yiProtection Fee kodwa zithi zilwa ulaphulo-mthetho. "Imiceli-mngeni yona 'kumaphara' siyayifumana oko andinakuze ndikubalekele ingakumbi thina ziinkokheli. Uyakwazi nokufumana umpu ongekho semthethweni kutsotsi uwuse emaPoliseni emva koko ngengakusa uve kusithiwa uyafunwa kuba uvulelwe ityala ngulo tsotsi ubuthathe umpu wakhe. Kona namaPolisa ngamanye amaxesha akhe asisebenzise nzima," utshilo uMayeliseki.
UNobhala Jjikelele weCommunity Policing Forum (CPF) eMpuma Koloni, uLudumo Salman, uthi yona le ndibano ibikukuza nesisombululo salento yeeforam ezibetha abantu zibabulale."Siyayilwa nathi loo nto siyiCPF, yokubethwa kubulawe abantu ziiforams, kuba ngokomgaqo-siseko woMzantsi Afrika akhomntu unelungelo lokubulala omnye, wonke ubani unelungelo lokuphila. Zona iiforam kufuneka zisebenzisane neeCPF kuzokwazi ukubakho izisombululo."
UNobhala Jikelele weeCPF eMpuma Koloni uLudumo Salman.
Image: ABONGILE GINYA
USalman uthi abo babekwiforum babanjwa bebanjelwa izityholo zokubetha kwanokubulala abantu babaxelele ukuba mababeke phantsi njengamalungu akhusela abantu. Uvale ngelithi iCPF neforam ayithathi imali yeProtection Fee.
Umama uXolelwa Sindesi waseMagalini abomvu olilungu leCPF nokwalilungu leforam uthi, uphume ecaciselekile kule ndibano kwaye ekwazi okulindelekileyo nokungalindelekanga xa bepatrola ebusuku. Uthi ungumntu ongumama kodwa wabona ukuba aphakame ngenxa yokuqhawulelwa iintambo zombane kwingingqi yabo.
UManB ukwahlabe ikhwelo kuluntu esithi abo sele bephuma ejele bethothoze iminyaka mabanikwe ithuba lokwamkeleka okwesibini xa sele bengaphandle bangacalucalulwa, kwaye bajongelwe nezakhono abanakuzenza ukuphucula iimpilo zabo.