Ziyi24 ezifileyo iigusha, kwezo beziyi200 eziyi145 ziyaphila nezibhaqwe eBhelekence kuQumbu emini ngeCawa ngamaPolisa nabahlali.
Image: SAPS
AmaPolisa akuQumbu avule ityala lokuzama ukubulala kwanelokubiwa kwemfuyo eLower Tyirha kubusuku bangoMgqibelo esivela kuwo, nekulapho kuye kwadutyulwa nenkosikazi (33) kwikhaya layo xa ibikroba ngethuba kubiwa imfuyo yakowabo.
Ingxelo ephuma emaPoliseni ithi, ngethuba abebi bemfuyo bekhupha iigusha eziyi200 kubuhlanti balo mzi, badubule efestileni imbumbulu yachana ixhoba (33) entla kwedolo noye emva koko wabalekiselwa kwikliniki eselalini neye yona yamthumela esibhedlele.
UCaptain Welile Matyolo uthi, amaPolisa aye afika ngobo busuku afumana igusha enye xa wayezulazula ekhangela.
Eziyi145 zibhaqwe ziphila zifihlwe kwezi ndonga, eziyi24 zabe sezifile.
Image: SAPS
Emini ngeCawa umhla we30 kweyoKwindla, amaPolisa aye afumana ulwazi lokuba kuneegusha ezibonwe kwilali iBhelekence ngasemlanjeni.
UMatyolo uthi ekufikeni kwawo amaPolisa ekhatshwa ngabahlali, bafike eziyi145 ziphila iigusha zifihlwe ezindongeni, eziyi24 zabe zidunduluzile ngaphandle kweendonga ezo sele zifile.
Okwangoku akukhomntu ubanjiweyo kwaye uphando luyaqhuba. AmaPolisa abongoza nabani na onokubanolwazi atsalele uDetective Commander, D/Captain Mteteleli Nongcawula ku0710371863. Lowo uze ngaphambili uza kukhuseleka.
Related Topics: