Inkulubaphathiswa yaseMpuma Koloni, uLubabalo Oscar Mabuyane, uthi uza kuphucuka umgangatho wobomi babahlali baseMbhashe neziphaluka. Oku ukutsho ngoLwesine ngethuba kuvulwa ngokusesikweni udederhu lweevenkile olwakhiwe ekuphumeni kwidolophu yaseDutywa ujonge eGcuwa ngakuhola wendlela uN2.
UMabuyane uthi utyalo-mali kolu dederhu lweevenkile alubonisi nje ukuzibophelela kukaRhulumente kuphuhliso kodwa lukwajolise ekuxhaseni amashishini asekuhlaleni noosomashishini.
USodolophu woMasipala uMbhashe, uSamkelo Janda, uthi ukuvulwa kolu dederhu lweevenkile kulindeleke ukuba kudale amathuba engqesho amaninzi, kwaye kunyuse uqoqosho lwale ndawo kuphuculwe uluntu.
Olu dederhu lweevenkile lubizwa ngokuba yiMbhashe LG Mall, luneevenkile ezingamashumi asibhozo (80) ngaphakathi nezikanokutsho ezifumaneka kwiidolophu ezinkulu kwaye lunendawo yokupaka eyaneleyo nethe gabalala yeemoto ezityelele eMbhashe LG Mall.
Uninzi kwanabo bazinzalelwane eDutywa nakwiziphaluka ezingqonge iDutywa kumakhasi onxibelelwano babonakalise ukuyithakazelela le Mbhashe LG Mall, besithi oku kwakuthi kuhlaziye iDutywa futhi ibesisipili nakwabadlula kuhola wendlela njengoko yakhiwe kwindawo entle kwaye esemehlweni kwabadlulayo.
Ongumhlali eDutywa nokwanguSihlalo wabathengisa ezitalatweni, iDutywa Hawkers Association, uBanele Nogada, uthi kuluvuyo kakhulu kubo: "Le mall itsho lukhulu kuthi nanjengoko singazuchitha zindleko xa sifuna iivenkile ezinkulu. Izinto ziza kuba lula ngoku," utshilo uNogada.
Uphethulo lwesoyi lweMbhashe Mall lwenziwe ekupheleni kuka2023 nguMbashe nenkampani ebisakha lo dederhu lweevenkile iExemplar REITail Ltd, McCormick Property Development, ibambisene nosomashishini uLivingstone Nogoduka neyakhiwe ngaye olu dederhu lweenvenkile. Le nkampani yathembisa ukuba olu dederhu lweevenkile luza kuvulwa ngelixesha ngo2025, ngenene isithembiso isifezekisile kubahlali baseDutywa.
Lo Masipala uthi injongo yeMbhashe LG Mall imiselwe ukuba ibeliziko eliphambili lokuthenga kunye nonxibelelwano loluntu kule ndawo. Abahlali kunye neendwendwe ngokufanayo banokujonga phambili kwindawo edlamkileyo apho banokonwabela ukuthenga, ukutya nanjengoko kukho neendawo zokuchopha utye nosapho, kunye nemisitho yoluntu.
INkulumbuso yaseMpuma Koloni uOscar Lubabalo Mabuyane ebhiyoza nabahlali eMbhashe LG Mall entsha kraca ngethuba ivulwa ngoLwesine eDutywa.
Image: Mbhashe LG Mall
Abantwana bezikolo ezohlukeneyo kwidolophu yaseDutywa besonwabisa uluntu ngethuba kubhiyozelwa ukuvulwa kweMbhashe LG Mall.
Image: Mbhashe LG Mall
USodolophu waseMbhashe Samkelo Janda, iNkulumbuso uOscar Lubabalo Mabuyane, usomashishini okuthiywe ngaye le mall uLivingstone Gcobani Nogoduka kuvulo lweMbhashe LG Mall eDutywa.
Image: Mbhashe LG Mall
IMbhashe LG Mall.
Image: Mbhashe LG Mall
Related Topics: