Kubanjwe ibhaki emhlophe kuStop and Go phakathi kweQumrha neQonce ngoLwesibini.
Image: IOL
Kurhatya lwangoLwesibini kule veki amaPolisa aseMpuma Koloni abambe ibhaki yakwa'Isuzu emhlophe kwindlela elungiswayo u'Stop and Go’ kuR63 phakathi kweQumrha kwakunye neQonce nekukholelwa ukuba ibandakanyeka kuphango olwenzeke kwimoto ethwala imali.
Ngokwengxelo yeSebe lezoThutho noKhuseleko eMpuma Koloni, ithi, le bhaki ibisingise eMthatha isuka eQonce, amaPolisa xa ebesondela kule moto iye yazama ukubaleka yaba ihamba ngomva kungekho ndlela yakujika abe engayekanga ukudubula kwimoto ebakhawulelayo yamaPolisa.
Isithethi soMphathiswa wezoThutho uMakahaya Komisa uthi, le moto yabarhanelwa ide yabe iyama apho kuye kwaphuma abarhanelwa ababini bexhobe ngemipu bebaleka, logama omnye wesithathu umrhanelwa nobengumqhubi wale bhaki kufikwe sele ebhubhile.
Umrhanelwa obhubhileyo kufikwe enxibe iiglavi ezandleni kwabe kukho nompu ecaleni kwakhe. Ngaphakathi kukwafunyenwe imipu emithathu iAK 47, iivesti zokuzikhusela, amapheyile amabini agcwele qhu ziimbumbulu kwakunye neziqhushumbisi.
UMphathiswa uXolile Nqatha uqwhabele izandla amaPolisa aseMpuma Koloni ngokukhawuleza babambe abarhanelwa.
"Ndifuna ukuncoma ubukroti obuthe benziwa ngamaPolisa ngokuthi akwazi ukukhusela ezi zikrelemnqa ekuhlukumezeni uluntu lwethu kwa nakumashishini. Oku kuthumela umyalezo kwabo bazimisele ukwenza ulwaphulo-mthetho bazibonakalise ukuba urhulumente uzimisele. AmaPolisa awazukushiya nanye kwaye engazuhleka ukuqinisekisa ukuba aba babini abarhanelwa babalekileyo bayabanjwa," utshilo uNqatha.
Related Topics: