Kuxhwilwe utitshalakazi kusasa ngoMvulo ngethuba efika esikolweni.
Image: IOL
Ngutitshalakazi oneminyaka engamashumi amane anesibhozo (45) oxhwilwe ngentsimbi yesibhozo kusasa ngoMvulo xa ebengena esikolweni esiya emsebenzini.
Utitshalakazi ebeqhuba imoto yakhe iToyota Fortuner engwevu ngombala ngethuba exhwilwa ngamadoda amathathu.
Ngokwengxelo kaCaptain Andre Beetge, ithi, amadoda amathathu ebehamba ngemoto emhlophe iToyota Corolla axhwile lo titshalakazi .
UMphathiswa weSebe lezeMfundo ePhondweni, uFundile Gade usikhalimele esi senzo senzeke kwisiThili saseNelson Mandela.
UGade ubongoze amaPolisa ukuba enze kangangoko libuye ixhoba nanjengoko usapho, oogxa balo esikolweni kwanabafundi beshiyeke benxunguphele.
I'solezwe lesiXhosa liyibonile ividiyo ngethuba kuxhwilwa ixhoba ngala madoda. Ibonisa exhwilwa sele engaphakathi kumasango esikolo ngethuba esohlika emotweni yakhe.
UCaptain Beetge uthi okwangoku akukabikho mali bayifunileyo kwaye akukabikho mkhondo.
Ityala lokuxhwila livuliwe kwisikhululo samaPolisa saseAlgoa Park. Kuyabongozwa onolwazi atsalele umcuphi UWarrant Officer Mike Joni ku071 475 1891 okanye ku08600 10111.