Lichithiwe ityala likasomashishini owaziwayo kwicandelo leeteksi.
Image: File
INkundla yaseMonti ilichithile ityala ebelijongene nosomashishini owaziyo kwicandelo leeteksi ngethuba evela ngoLwesithathu kule veki.
Ngokutsho kwengxelo yamaPolisa oMzantsi Afrika, umrhanelwa lo ebebanjelwe amatyala aquka ukuthatha imali ngokungekho semthethweni (extortion), ungquzulwano olubaphakathi kwemibutho yeeteksi, elokuzama ukubulala, kwanelokuba nemipu engenazimpepha.
Isithethi samaPolisa, uMajor General Nonkululeko Phokane, uthi ukubanjwa kwakhe kulandela emva kophando olude obelusenziwa ngabecuphi beqela leNational Taxi Violence and Extortion Task Team, nejongene kuphela namatyala okuthatha imali ngokungekho semthethweni, kuquka nengxwaba-ngxwaba ekwimibutho yeeteksi eMpuma Koloni.
Igqwetha lomrhanelwa nebelisenkundleni eMonti lithetha neentatheli, uNqaba Nomvethe, uthe izityholo ngakumrhanelwa bezingenasihlahla kwaye zingenakukhokelela kutshitshiso oluyimpumelelo.
Kusenjalo, uPhokane ukwadiza ukuba amaPolisa abambe umama naye obandakanyeka kwizenzo zokuthatha imali ngokungekho semthethweni eMidrand ngoMvulo kule veki.
Lo mama uvele ngoLwesibini kule veki phambi koMantyi waseRandburg kwaye ushiyeke ngaphakathi eziseleni nalapho ityala lakhe lithunyelwe eMonti aza kuvela khona kwiveki ezayo ngoMvulo.
UMphathiswa wamaPolisa kuzwelonke uSenzo Mchunu kwimbalelwano yoonondaba uwancomile amaPolisa ngokubamba aba somashishini.
Related Topics: