Ugwetywe ubomi ejele ngokubulala ngezembe umakhulu wakhe kwakunye notatomkhulu wakhe kuba wayefuna imali yokuthenga iziyobisi.
Image: NPA
UQhamani Katana Nqayi (29), waseChatha kuQoboqobo, nowaxabela ngezembe umakhulu notatomkhulu wakhe kuba efuna ngenkani iifowuni zabo ukuze azithengise azokufumana imali yokuthenga iziyobisi, ugwetywe ubomi ngokubulala – ngaphezulu neminyaka ngokuphanga, egwetywa yiNkundla ePhakamileyo yoMzantsi Afrika ebichotshelwe eBhisho.
Ingxelo yeNPA ithi eli tyendyana livumile ityala lalo phambi kwenkundla, elokubulala uMlungisi noNomboniso Nqayi ngethuba kuqhuba ityala, lisithi lalifuna ukuthenga iziyobisi.
UNqayi wahlasela amaxhoba ngobusuku kwindlu enkulu abalala kuyo wathatha iifowuni zawo. Ngethuba esenza lo mkhuba, aye othuka avuka amaxhoba akuva ukuba kukho umntu ngaphakathi endlini. Wabe sele ethatha izembe ebaxabela kwangoko, emva koko wathatha iifowuni wayokuzinika indoda eyaziwayo ukuba ithengisa iziyobisi ekuhlaleni.
Ngengakusa, umalume womrhanelwa nongunyana wamaxhoba, xa evuka esiya endlini enkulu njengesiqhelo, wothuswa ngumbono ombi wabazali bakhe, wabe umzukulwana oneminyaka emibini (2) ehleli ngakule mizimba.
Ingxelo yeNPA iqhuba ithi, umrhanelwa naye wavuka wahlala ecaleni kwendlu yakhe engabonakalisi mothuko nakuzisola. Izembe elisetyenziswe ukubulala amaxhoba lifunyenwe ngakwimizimba yabo ngamapolisa emva kokuba ebizwe ngumalume nabahlali.
UMlawuli wezoTshutshiso eMpuma Koloni, uBarry Madolo, udize ukuba ngoLwesithathu kule veki kuza kubanjwa iMbizo eLower Gxulu kuQoboqobo apho onke amasebe ajongene nokulwa nolwaphulo-mthetho aza kube angungelane khona kwiMbizo nanjengoko ingummandla orhangqwe lulutsha olugaxeleke kwiziyobisi. Apha amasebe aza kube efundisa uluntu.
Related Topics: