Inkundla yaseMalawi iyalele ukuba ozibiza ngokuba ungumprofeti, uShepherd Bushiri kunye nenkosikazi yakhe, uMary Bushiri, babuyele eMzantsi Afrika ukuya kujongana namatyala abatyatyekwa ona.

UMphathiswa wezoBulungisa noPhuhliso loMgaqo-siseko uMmamoloko Kabuyi, uthe urhulumente woMzantsi Afrika usamkele esi sigwebo ngoLwesithathu.

Esi sibini sasivele phambi kweenkundla ezimbini zoMzantsi Afrika ngo2020, sijongene nezityholo zolwaphulomthetho.

Esi sibini sanikwa ibheyile silindele ukuxoxwa kwetyala labo kodwa basilela ukuthobela imiqathango yebheyile saza salishiya eli loMzantsi Afrika phantsi kweemeko ezingaziwayo. Kamva bafunyanwa eMalawi.

Ngendlela yokuphendula, uMzantsi Afrika ungenise isicelo eMalawi sokubuyiselwa kwesi sibini, ngelizama ukuba esi sibini sibuyiselwe ukuze sijongane nezityholo, eziquka, ukudlwengula, ukwaphula imiqathango yebheyile, ukwaphulwa umthetho weContraventions of the Financial Advisory and Intermediary Services Act, ukubalula ezimbalwa.

"Esi sigqibo siqinisekisa ukuzimela kwenkundla, intsebenziswano yamazwe ngamazwe, kunye nokuthembela koluntu kumaziko ezomthetho aseMzantsi Afrika naseMalawi," utshilo uKabuyi kwingxelo.

"Ibethelela umthetho-siseko wokuba akukho mntu ungaphezulu komthetho kwaye igxininisa ukubaluleka kokuziphendulela izenzo zakho, ukwenza izinto elubala, kunye nokuthotyelwa kwemigaqo yomthetho eMzantsi Afrika naseMalawi."

Eli tyala litsale umdla woluntu namajelo eendaba, liqaqambisa imiba ebanzi yorhwaphilizo kunye noxanduva lokuziphendulela.

UKabuyi ubethelela indima ebalulekileyo yezivumelwano zomthetho kunye nezivumelwano ekulweni ulwaphulomthetho lwamazwe ngamazwe.

UMzantsi Afrika usazibophelele ekomelezeni intsebenziswano esemthethweni neyozakuzo ukuqinisekisa ukuba abo babalekayo bajongana nengalo yomthetho kwaye iinkqubo zomthetho zihlala zinobulungisa, zithembekile, kwaye zisebenza kakuhle, wongeze watsho.

ISebe lezoBulungisa noPhuhliso loMgaqo-siseko lisebenzisana neGunyabantu laseMalawi, i-INTERPOL, iGunyabantu lezoTshutshiso (NPA), kunye neNkonzo yesiPolisa yaseMzantsi Afrika (SAPS).

UKabuyi wongeze ngelithi uxelelwe ukuba esi sibini sifuna ukubhena esi sigwebo senkundla.

"Urhulumente woMzantsi Afrika uza kusichasa esi sibheno. ISebe liza kulinda isiphumo senkqubo yesibheno ukuba ngaba liyaqhuba."

Uthe ukuba ababheni, iSebe lezoBulungisa liza kulinda isaziso esisesikweni esivela kwiGunyabantu laseMalawi.

"Yakuba sifunyenwe isaziso, i-INTERPOL, ngokusebenzisana namapolisa aseMzantsi Afrika, iya kuququzelela amalungiselelo okubathumela. Urhulumente uza kuhlawula zonke iindleko ezinxulumene noko," wongeze watsho uKabuyi.