Abanye bonwabile logama abanye benyembezana ngokubhubha kukaBara

Abongile Ginya|Published 1 month ago

Umzobo wongasekhoyo uYanga ‘Bara’ Nyalara kwiminyaka emibini edlulileyo, uxhonywe ngabahlali baseSite C bephambi kwaMantyi eKapa befuna akhululwe ejele kuba besithi uyabakhusela kwaye kuyonakala xa engekho ekuhlaleni. UMFANEKISO: IOL

AmaPolisa akhuphe ingxelo entsha eyokuba abasekho bathandathu (6) ngoku basixhenxe (7) abarhanelwa abathe babhubha kudubulwano lwabo kwakunye namaPolisa nolwenzeke emini ngoLwesine kuNdabakazi.

Oku kuza emva kokuba amaPolisa ethe ahletyelwa ukuba kuneemoto ezimbini iToyota Fortuner nezifohlele zizibham ezingafunanga ukumiswa ngamaPolisa aseCofimvaba. Omnye umrhanelwa ubhaqwe emlanjeni nanjengoko enye imoto ibibaleke yayokuzifohla kumlambo iCegcuwana ngethuba ibaleka kudubuwano lwayizolo.

Ingxelo ithi kula madoda asixhenxe (7) abhubhileyo, bekukho nobekade enguphunyuka bemphethe uYanga ‘Bara’ Nyalara (32) ehamba noonogada bakhe bephuma kwindibano ebikhwetywe nguye yoonoteksi kuCofimvaba.

UNyalara nangona eyinzalelwane yaseCofimvaba, ebezinze eNtshona Koloni ekwicandelo leeteksi.

ULieutenant Siphokazi Mawisa uthi iimoto ebebehamba ngazo abarhanelwa zizamile ukumiswa ngamaPolisa eCofimvaba kodwa azama de zabe zivingcelwa ngamaPolisa aseGcuwa.

Yanga ‘Bara’ Nyalara phakathi kwakunye noNogada bakhe. UMFANEKISO: IOL

UMawisa uthi abarhanelwa bathe bakubona amaPolisa baqala ngokwabo ukudubula, amaPolisa nawo abuyekeza ngezawo kwabhubha abarhanelwa abathandathu (6) kwangoko nekuquka uNyalara.

UMphathiswa wezoThutho noKhuseleko uXolile Nqatha uwaqhwabele izandla amaPolisa ngendlela athe aqobisana ngayo naba barhanelwa. UNqatha uqhube wathi, ufuna ukuqinisekisa kwizikrelemnqa ukuba amaPolisa awasoze asonge zandla xa ehlaselwa. Esithi akukho nasinye isigrogriso esizakuma endleleni kaRhulumente, uza kusiphula neengcambu ulwaphulomthetho.

UCeba waseSite C eKhayelitsha uKhaya Kani akaphendulanga kweli phephandaba I’solezwe lesiXhosa.

I’solezwe lesiXhosa likwazamile ukuthetha nosapho lukaNyalara kodwa ngaphandle kwempumelelo.

UMawisa uthi ithathiwe imipu leyo ibingaphakathi kwezo moto kwaneemoto ezo. Uphando luyaqhuba kwaye lunikezelwe kwi-IPID.

UNyalara ebejongene namatyala amaninzi eNtsona Koloni, sele esuka noyokugwetywa kodwa ebesengaphandle emva kokuba kumatyala ebejongene nawo iNkundla yathi akho bungqina bukhomba kuye ngokwengxelo kaIOL.

Ngethuba esenkundleni uBara, elinye lamaphephandaba eIndependent Media abonisa ividiyo apho abahlali bebeqhankqalaza phambi koMantyi besithi makakhululwe uBara kuba alubikho ulwaphulomthetho eSite C xa ekhona, kubakho ucwangco kwaye uyabakhusela.

Logama kumakhasi onxibelelwano basakhala nangoku abanye ngokubhubha kwakhe besithi baza kuba zizisulu zolwaphulomthetho eSite C. Kambe abanye bevuya besithi bangcungcuthekisiwe nguBara.