Kudutyulwe amadoda amathathu abhubha eGqeberha!
Amapolisa ecandelo leProvincial Serious and Violent Crimes, eGqeberha, aphanda amatyala amathathu okubulala, nelokuzama ukubulala, kwisehlo sayizolo, ngoLwesithathu, umhla we19 kweyoMdumba, eSwartkops.
Ingxelo ekhutshwe nguCaptain Sandra Janse Van Rensburg, ithi, malunga nentsimbi yeshumi elinanye kusasa izolo ngoLwesithathu, amapolisa athe asabela isikhalazo sezithonga zompu ezivakele e-Elephant Park Informal Settlement, kwisitalato iDwarha, eWells Estate.
Ingxelo iqhuba ithi, ukugaleleka kwamapolisa, afumene imoto yohlobo lweFord Fiesta enombala oluhlaza, iyame ngepali yesibane phakathi kwemikhukhu, kwaye inemingxuma yeembumbulu.
Amapolisa afumene imizimba yamadoda amathathu abesele eswelekile, enamanxeba okudutyulwa entloko. Amaxhoba amabini aneminyaka eyi23 neyi32, kwaye ebengaphakathi kule moto, ngethuba ixhoba lesithathu neliminyaka yalo ingaziwayo, belingaphandle kwemoto. Ukanti ixhoba lesine kula maxhoba nalo ebelingaphandle emotweni, lithe laleqiswa esibhedlele ukuze lifumane unyango.
Akukabikho ezinye iinkcukacha ezithe zafumaneka. Kuvulwe amatyala amathathu okubulala, nelinye lokuzama ukubulala, kwaye uphando luyaqhuba.
Amagama amaxhoba akakapapashwa, de kufunyanwe izihlobo zawo, kwaye afaniswe ngokusemthethweni.
Amapolisa acela nabani na onokuba neenkcukacha ngesi sehlo ukuba aqhakamshelane nomphandi weli tyala uDetectivbe Lieutenant Colonel Monde Sitole, kwinombolo ethi 082 457 2812, okanye atsalele inombolo yeCrime Stop ethi 08600 10111.
Ukanti unako nokutyelela isitishi samapolisa esikufutshane, okanye usebenzise iApp kaMySAPS. Zonke iinkcukacha namagama abo bathe banika ulwazi, akugcinwa eyimfihlo.