Owokholo uthembisa ubumnandi bodwa ekhonsathini
UMZWILILI womculo wokholo odume kakhulu emazweni aphesheya kwezilwandle, uNtombenhle "Ntombie" Shobede, uthembisa ulozolo olwehla esiphundu kwi-An Evening with Ntombie, eBon Hotel, eMpangeni ngoLwesihlanu kusukela ngo-6 ntambama. Lo mculi uzobe eshiyelana inkundla nesihlabani sokholo, u-Ayanda Ntanzi noMinister Ayanda Nene wodumo kwiTshwane Gospel Choir neSpirit of Praise. UNtombie waseMpangeni uthe abantu abalindele ukuzwa unqambothi lomculo ozobe uhlatshelelwa bukhoma.
"Kuzobe kuwubusuku bekhethelo obungasoze balibaleka futhi ngijabule kabi ngalo mcimbi kangangoba sengikulangazelele kabi ukuba kulo mcimbi wokholo kuphela. Kufana nokuthi ngibuyele ekhaya. Kungathi ngibuyela ezimpandeni zami ngoba yilapho ngacijeka khona futhi yilapho uthando lwami lokucula laqala khona. Ngabe angisiye loNtombie enguwuye ukube awubanga wuThixo. UJesu Khrestu uqobo lwakhe. Kumnandi ukumdumisa ebusheni bami nokukhuthaza kanye nokuvuselela abanye ukuba babuyele esiphambanweni esiyisiqalo nesiphetho sakho konke," kusho uNtombie.
Ubuye wagqugquzela abantu ukuba baphuthume eComputicket, Checkers nasezitolo zakwaShoprite ukuze basheshe bazitholele amathikithi ngoR150 ngoba bengase basindwe yizinyawo.
"Abantu abaqinisekise ukuthi bayashesha ukuzitholela amathikithi ngoba adayisa okwamagwinya ashisayo. Ngizobe ngiqhulula izingoma ezingasoze zabuna."
Yize uNtombie engakaziwa kangaka kuleli kodwa uyinyama emazweni angaphandle. UNtombie uqale ukuzungeza amazwe aphesheya kwezilwandle eseneminyaka ewu-17 ngesikhathi eseyinxusa nomculi owayengaphansi kweStar for Life Organization.
"Ngacula kuchungechunge lwamakhonsathi aseSweden iminyaka ewu-15. Ngabuye ngathola ingqayizivele yethuba lokucula ngokuhlanganyela neqembu elidumile eSweden, iTriple&Touch. Ngaleso sikhathi ngabuye ngashiyelana inkundla nezihlabani zomculo zasemazweni ase-Europe, okungoMans Zelmerlov, John Lundvik, Andreas Waise, Shirley Clamp, Sonja Alden nabanye abaningi. Lapho eNingizimu Afrika ngisine ngidedelana inkundla futhi amahlandla amaningi nomrepha ongasekho, uPro Kid."
UNtombie ubuye wazungeza nakoDenmark, Norway, Greece; Morocco, UK naseSpain.
"Muva nje bengikwa-Israel, lapho ngicule phambi kweMeya yaseJerusalema ngesikhathi kunomcimbi wokunikezelwa ngomklomelo weNobel Peace Prize. Sengike ngacula phambi kweNgonyama neNdlobukazi yaseSweden kade kunomcimbi weNobel Peace Prize eStockholm. Ngisho nabaNtwana baseNdlunkulu kaZulu sebeke bangibona bukhoma ngicula."
Kunamanoni amaningi awaqambe ngokubambisana nezingwazi zako-UK, Sweden naseDenmark. Ngo-2017 wakhipha umucu wakhe wokuqala owawuthi Right Beside Me kwathi ngo-2020 wakhipha i-albhamu eyi-EP esihloko sithi When I Grow Up. UNtombie usebenzisa umculo wakhe ukukhuthaza nasekuthokoziseni abantu abasha nabesifazane. Ingxenye yenzuzo ayothola ngomculo wakhe unikela ngayo ezinhlelweni zokufukula umphakathi zeStar for Life Organisation. Usanda kukhipha i-video yomucu wakhe osihloko sithi Our Song.