UMdu noLwah Ndlunkulo kwesokuba ngamanxusa enkomfa yomculo

UMDU Masilela noLwah Ndlunkulu bangamanxusa eMoshito Music Conferencen& Exhibition yakulo nyaka isithombe:FACEBOOK

INGWAZI yomculo wekwaito, uMdu "The Godfather" Masilela nomculi we-Afro pop osematheni kulezi zinsuku, uLwah Ndlunkulu oyiNkabination 1st Lady, baqokwe ukuba ngamanxusa eMoshito Music Conference & Exhibition yakulo nyaka.

UMdu waduma ngamanoni amaningi elinye lithi 50/50, Ichomi Yabana nelithi Mazola kanti uLwah Ndlunkulu waziwa ngelithi Ngiyeza, Ithuba nelithi Eyami. IMoshito Music Conference & Exhibition seyizakhele udumo ngokuhlanganisa izinhlobo zomculo zaseNingizimu Afrika.

U-STANLEY Khoza uthe kulo nyaka bakhiphe unyawo njengoba beqeda iminyaka ewu-20 Isithombe:SITHUNYELWE

Usihlalo weMoshito, uStanley Khoza, uthe kulo nyaka umbuthano uzoqala ngo-Okthoba 25 uze uphothulwe ngoMgqibelo.

"Kulo nyaka kuboshelwe izihambeli zamazwe ngamazwe, okubalwa kuwo iBotswana, Cameroon, France, Jamaica, Mauritius, Mozambique, Reunion Island, Nigeria, eSwatini, Seychelles, UK nakwamanye amazwe amaningi.

Le ngqungquthela inikezela ngethuba lokucobelelana ngolwazi nokusebenzisana ezingeni lomhlaba.

"IMoshito 2023 yakulo nyaka izobe igubha ukuqeda iminyaka engu-20. Leli dili lomculo linamakhonsathi amabili neStreet Festival," kusho uKhoza.

Esephetha uKhoza uthe ikhonsathi yokuqala izokuba ngoLwesithathu e-SABC M1 Studios, kulandele i-Afro World Night Concert ngoLwesine, bese imbenge iphothulwa ngeFree Festival eSoweto ngoLwesihlanu.

Ezinhlanganweni ezibambe iqhaza kwiMoshito kubalwa i-Aesa, Airco, Acumda, Risa, Samro, Kumisa, Compesa, Masa, Saacyf, Zindala Zombili, Sampra nezinye.