Inesasasa ifilimu yoMbongeni Ngema
IQENGQELEZA phambili ngezibalo kwi-e.VOD ifilimu esihloko sithi A Queen's Lobola.
Lo mdlalo ubophele izihlabani zakuleli okubalwa kuzo uMbongeni Ngema, uWinnie Ntshaba, Jo-Anne Reyneke noMduduzi Nombela.
Lezi zindaba zidalulwe ngomunye wabadidiyeli bale filimu, u-Ashish G.
Uthe isasasa ngale filimu lidalwe wukwesekwa nokuthandwa wumphakathi oyibukelayo kwi-e.VOD.
"Sijabule kakhulu ngokuthi ifilimu yethu, i-A Queen's Lobola, iyaqhubeka nokuhlanganisa abantu."
Uthe abantu abangakayibuki le filimu bangayibuka kahle ngamaSonto.
Kule filimu kuvezwa abangani ababili, uCliff (Jefferson Lan) noZamani (Linda Nxumalo) bedingida okuthize ejoyintini laseLondon, e-UK, kanti amehlo kaCliff azozithela kusukasambe wentokazi enguQueen (Jo-Anne Reyneke).
UCliff ukholwa wukuthi lesi simomondiya sizoba wusofasilahlane wakhe.
Emuva konyaka uCliff ucela ukushada noQueen njengoba elungiselela ukubuyela eNingizimu Afrika kodwa uQueen uthi kufanele uCliff aqale ngokucela isihlobo esihle kubazali bakhe ngaphambi kokuba babophe ifindo likasofasilahlane.
ENingizimu Afrika uZamani uletha umngani wakhe noVusi (Mduduzi Nombela), obaphelezela njengomalume ezingxoxweni zamalobolo.
UMnuz Zulu (Ngema) uphoqa uCliff ukuba alethe ilobolo lezinkomo ezingu-100 kungakapheli izinsuku eziyisikhombisa ukuze abanikeze izibusiso benendodakazi yakhe.
UCliff uyashaqeka ngokuzwa intengo yenkomo ngayinye. Uphumelela ukuthola imali yokuthenga izinkomo eziwu-40 futhi akekho umlimi ozimisele ukumnikeza ezingu-60.
UCliff ucabanga ukweba ezinye zezinkomo. Kafushane le filimu ikhuluma ngobumqoka bokuthanda umuntu, ukuzinikela nezinto ongazenza ukukhombisa uthando.
Isolezwe lithole ukuthi le filimu iqoshwe ezindaweni zaseKZN okubalwa kuzo iStanger, Salt Rock, Kersney naseDoringkop.
*Ukubukela i-A Queen’s Lobola ungena kule-website:www.evod.co.za