UXOLANI ‘Sxaxa’ Henema uzongcwatshwa ngoMgqibelo emathuneni akubo eMondlo Isithombe:SITHUNYELWE
UTHATHWE wukugula okumhlasele isikhashana umlingisi uXolani ‘Sxaxa’ Henama, ogqame emdlalweni wethelevishini iDurban Gen.
Lokhu kudalulwe yilungu lomndeni uMabefu Henama, lathi umlingisi uxineke kakhulu emasontweni amabili edlule, washona ngoLwesithathu esibhedlela eClairwood, eThekwini.
UXolani (47) waKwaNdengezi, ulingise emidlalweni eminingi ngaphambi kokulingisa indawo yesiguli koweDurban Gen.
Uke wasebenza noBaby Cele, Bonga Dlamini, Mondli Ngcobo nabanye emdlalweni weshashalazi kaJerry Pooe, i-1976:The Musical. Walingisa koweshashalazi iKing Cetshwayo The Musical, nakoweChief Albert Luthuli-Let My People Go The Musical.
Inkonzo yesikhumbuzo sikamufi izokuba ngoLwesibili ngo-1 ntambama ePlayhouse, eThekwini. UXolani ushiye emhlabeni indodakazi. Ngokusho kukaMabefu, inkonzo yokuvalelisa uXolani izokuba ngo-10 ekuseni ngoMgqibelo, bese eyofihlwa emathuneni aseMondlo, eVryheid.
Related Topics: