KUZOCACA ntambama ukuthi iKaizer Chiefs ibiphezu kwaziphi izinhlelo ngesikhathi sekhefu uma isibhekene neLamontville Golden Arrows koweBetway Premiership eMoses Mabhida Stadium.
Image: BACKPAGEPIX
UKUQHUBEKA kwemidlalo yeBetway Premiership kule mpelasonto ngemva kwemidlalo yamazwe namazwe kuzonikeza amaqembu adinga ukuvuka azithathe ithuba lokukhombisa ukuthi abematasatasa ngani ngesikhathi kusahlatshwe ikhefu.
Lesi sigaba esiqalwa kule mpelasonto sibucayi kuwona wonke amaqembu ngenxa yezizathu ezehlukene. Amanye asabheke isicoco, amanye alwela ukungena emiqhudelwaneni yeCaf, amanye afuna ukubalwa kwiTop 8, kanti amanye alwela ukufa nokuphila njengoba esengcupheni yokugawulwa yizembe.
IKaizer Chiefs ngelinye la maqembu okubhekwe ngabomvu ukuthi lizobuya kanjani emdlalweni wanamuhla weBetway Premiership ozoqala ngo-3.30 ntambama eMoses Mabhida Stadium, eThekwini.
Amakhosi aphindela eGoli esemabokoboko ngesikhathi egcina ukuvakashela KwaZulu-Natal ngenxa yesibhaxu sika 2-0 asithola kwiRichards Bay FC.
Lo mphumela washiya iqembu likaNasreddine Nabi endaweni yesishiyagalombili kwi-log ngamaphuzu angu-29 emidlalweni engu-22.
Ngesizini edlule iChiefs ihlanganise imidlalo engu-22 isiqoqe amaphuzu angu-31, okukhombisa ukuthi umqeqeshi lo mqeqeshi waseTunisia ofike ekuqaleni kwesizini ethwelwe ngeqoma akakakwazi ukubeka iqembu endaweni engcono.
Inkinga enkulu yaleli qembu lasePhefeni wukuthi kule midlalo eseliyidlalile lisashaye amagoli angu-22, ladedela angu-26.
Inkinga yokuvuza emuva isheshe yabonakala isizini isanda kuqala kodwa kuze kube yimanje uNabi nethumba lakhe abakalitholi ikhambi. Lo mqeqeshi useshintshe onozinti nezitobha, kodwa kwanhlanga zikuma nomoya.
Izinto azilungi naphambi kwepali njengoba engekho noyedwa umdlali weChiefs osehlanganise amagoli amahlanu kwiligi kule sizini.
Abafana Bes’thende ngelinye lamaqembu azicoshela amaphuzu kwiChiefs emzuliswaneni wokuqala kule sizini, eyinqoba ngo 1-0 eMoses Mabhida ngoJanuwari nonyaka.
Ngaleso sikhathi izintambo zazisabanjwe nguMusa Bilankulu noKagiso Dikgacoi, kodwa kulokhu sebezobuya iqembu seliphethwe nguqweqwe lomqeqeshi, uManqoba Mngqithi.
I-Arrows igcine ngesizini ka-2021/22 ukunqoba iChiefs kuyona yomibili imidlalo yeligi.
Amanye amaqembu iChiefs esazobhekana nawo kweyeligi kule sizini yiTS Galaxy, Chippa United, Marumo Gallants, Orlando Pirates, Sekhukhune United, Polokwane City neRoyal AM.
Uma leli qembu liqhubeka nokudedela amaphuzu lingase lizithele ngehlazo elifanayo nelesizini edlule, lapho laqeda khona endaweni ka-10 ngamaphuzu angu-36.
Related Topics: