UKABELO Dlamini we-Orlando Pirates ozokweqiwa umdlalo weligi olandelayo ngenxa yesigwebo samakhadi Isithombe: BACKAPAGEPIX
AMAQEMBU athathwa njengamakhulu kwiPremier Soccer League (PSL) azoyidlala eshoda imidlalo yawo yamaphakathi nesonto yeBetway Premiership ngenxa yokuziphatha budlabha kwabanye babadlali bawo kweyakamuva.
Izolo emini, i-PSL ikhiphe uhla lwabadlali abangeke babonakale emidlalweni yeligi yanamuhla nakusasa ngenxa yezigwebo zamakhadi ngokwahlukana kwabo.
Okugqame kulolu luhla lwabazokweqiwa yimidlalo, wukuthinteka kweKaizer Chiefs, Mamelodi Sundowns ne-Orlando Pirates ngokwahlukana.
IMamelodi Sundowns ejaha isicoco, izobhekana neMarumo Gallants ekuhambeni kusasa, ngaphandle kukaTashreeq Matthews oyishayele elinye lamagoli ngesikhathi inqoba inqoba ngo 2-0 kwiMpheni Home Defenders kowe-Last 16 yeNedbank Cup ngeSonto.
Nakuba uMatthews engayiqali yonke imidlalo yeSundowns kodwa ungomunye wabadlali abahlale benza into ebonakalayo uma benikwe ithuba. Lokhu kufakazelwa ngamagoli ayisikhombisa asewashayile kwiligi, Nedbank nakwiCaf Champions League ngokwahlukana kule sizini.
Namuhla iChiefs izokwamukela iSuperSport United ngaphandle kukaSamkelo Zwane ongomunye wabadlali bayo abathembisayo ngenxa yaso belu isigwebo samakhadi.
UZwane owuqalile oweChippa, uzophambana noYusuf Maart ongawudlalanga owamaChilli Boys ngenxa yesigwebo esifanayo.
KwiPirates ongeke adlale uKabelo Dlamini ekubeni kade efakelwe ukuzovala isikhala sikaThalente Mbatha olimele ngesikhathi iPirates izibekisela indawo kwi-quarterfinal ngempelasonto.
Yize kungakacaci noma uMbatha uzobe ekhona kowePirates neGolden Arrows kusasa kodwa ikhadi likaDlamini lizitolika ngokuthi umqeqeshi wayo, uJose Riveiro, uzophoqeleka ukuqhubeka nokusebenzisa uNdabayithethwa Ndlondlo odlale kahle kodlule weBucs inqoba ngo 3-0 kwiBaroka FC.
Ukushoda ngomdlali sekuqala ukuzwela cishe kubona bonke abaqeqeshi kwazise isizini isingena kuvuthondaba njengoba isizoqala umzuliswano wesibili.
KwiCape Town City kuzoba iphini lomqeqeshi, uLebohang Manyama, elizokweqiwa wumdlalo abazowudlala neChippa United kulandela isijeziso sakhe ngesikhathi behlulwa iMagesi FC muva nje.