UMQEQESHI we-Orlando Pirates, uJose Riveiro, ongeke ayivuselele inkontileka yakhe naleli qembu ekupheleni kwesizini.
Image: BACKPAGEPIX
I-ORLANDO Pirates izoqala phansi ithungathe umqeqeshi omusha kulandela isimemezelo sayizolo sokuthi uJosé Riveiro uzosishiya isikhundla sakhe ekupheleni kwesizini.
URiveiro (49) wafika kuleli qembu lase-Orlando ekuqaleni kwesizini ka-2022/23, esuka kwelaseFinland, kwiFC Inter Turku engazelwa lutho ebholeni lomhlaba. Ngenxa yalokhu, baningi abalandeli abebewangabaza amagalelo akhe kwazise eZimnyama zazidinga umqeqeshi ozobuyisa izinsuku zenjabulo.
Nokho usheshe wazifaka ezinhliziyweni zabalandeli ngokuwina iMTN8 neNedbank Cup kumasizini akhe amabili okuqala, waphinde walala isibili kwiligi ngemuva kompetha iMamelodi Sundowns.
Ekuqaleni kwesizini ka-2024/25, wengeze isicoco sesithathu seMTN8 kanti eZimnyama zisasembangweni weNedbank Cup, lapho lizotholana phezulu noMarumo Gallants kowandulela owamanqamu ngo-Ephreli 13, e-Orlando Stadium, eSoweto.
EzikaMagebhula zisendaweni yesibili kwiBetway Premiership ngamaphuzu angu-43 emidlalweni engu-19, zisele ngamaphuzu angu-15 kwiSundowns, esidlale imidlalo emine ngaphezulu.
Ngaphansi kukaRiveiro, iPirates ifinyelele kuma-quarterfinal eCaf Champions League okuyinto osekuneminyaka yagcina ukuyenza ngaphansi kwabaqeqeshi abahlukene. Ikwenze lokhu ingakaze yehlulwe. NgoLwesibili ebusuku iqumbe phansi iqembu lase-Algeria, iMC Alger, ngo 1-0 ekuhambeni emlenzeni wokuqala we-quarterfinal.
Ngokwesitatimende esikhishwe yileli qembu, uRiveiro odabuka eSpain, ulitshele ukuthi ngeke ayivuselele inkontileka yakhe uma kuphela le sizini.
“Nakuba besingathanda ukuthi uJosé aqhubeke nokuhlala eqenjini kodwa siyasihlonipha ngokugcwele isinqumo sakhe. Siyambonga ngakho konke akwenzele iqembu. Injabulo elethwe nguJosé nalaba abebambisene nabo ayizose yalibaleka,” ubeke kanje usihlalo wePirates, uDkt. Irvin Khoza.
"Zimbili izinto ezizokwenziwa yiqembu. Okokuqala; ngokuhambisana nezifiso zomqeqeshi, sizothola isikhathi esifanele sokumbonga ngokugcwele u-José negalelo lakhe eqenjini. Okwesibili; sizoqala umsebenzi omkhulu wokuthola lowo ozovala isikhala sakhe ngaphambi kwesizini ka-2025/26.
“Siyayithokozela iminyaka emithathu uJosé ayichithe kuleli qembu futhi siyaseseka ngokugcwele isinqumo sakhe. Noma yikuphi lapho uhambo lwakhe luzomyisa khona kumele azi ukuthi umndeni we-Orlando Pirates uyohlale umseka."
Nakuba iPirates ingasidalulanga isizathu sokushiya kukaRiveiro kodwa kusabalale amahlebezi okuthi unkosikazi wakhe uyenqaba ukuzohlala naye eMzansi. Lokhu kuholela ekutheni avakashe njalo eSpain.
Kwenzeka lokhu nje, leli qembu belisanda kukhipha iqophamlando ekhasini lalo kwiYouTube, lapho belikhuluma khona ngamagalelo kaRiveiro kanye nokuphela kwenkontileka yakhe ngoJuni. Abanye babadlali bazwakalise ukungenami ngokuthi lo mqeqeshi angase ahambe.
Kuzocaca ngokuhamba kwesikhathi ukuthi iPirates izophinde imbheke phesheya yini umqeqeshi ozovala isikhala sikaRiveiro, noma lizoqalaza ekhaya.
Eminyakeni edlule, yaqasha abangaphandle ababengadumile okubalwa kubona uJozef Zinnbauer noKjell Jonevret.
Related Topics: